Heb 5 | KGF | STEP | Hofac oo ic kiwa méŋac méŋ imi baec ic sucnina igucnec Anutuac ai buŋawac megési énécmimia. Imi mia baec ic neŋaŋ niŋac wamma Anutu eŋeya muru képésicninawac mulu ʒéma sese haimimu niŋac kumu énécmimia.

Hebrews 5

1 Hofac oo ic kiwa méŋac méŋ imi baec ic sucnina igucnec Anutuac ai buŋawac megési énécmimia. Imi mia baec ic neŋaŋ niŋac wamma Anutu eŋeya muru képésicninawac mulu ʒéma sese haimimu niŋac kumu énécmimia. 2 Hofac oo ic kiwa imuhucya imi qeka meka hakayanéŋ lelecgémiyu kecanʒac. Hénia imuac niŋ, inéŋ ewa soho ic ʒéma rouc wamma kekera imuhucya hia niŋ énécmima bénʒéŋnec waŋ énécmimacac séc wanʒac. 3 Waŋu hénia imuac niŋac ic embac ionac képésic niŋac ʒéma eŋeya képésic niŋac momacnec mulu ai memacac hezac. 4 Ai ee héihéiyaguc imuhucya ic méŋnéŋ eŋeya ewa siŋ niŋac mema wawaŋa séc qahac, néŋ Aron ésécnec Anutunéŋ héihéré mimia inéŋ sac hia memacac séc.

5 Waŋu Kristonéŋ hofac oo ic kiwa waŋec imi acguc imuhucyanec eŋeya ménda meeŋ amuyec, néŋ Anutunéŋ iwac ézéma gi imi nuac naŋna ni deguc mihicŋi génʒua ʒéma gésimiyec. 6 Waŋu kiwi téréya méŋu ac yomuhuc ʒéyec; Gi imi Melkisedewac areŋiguc hofac oo ic tetecgia qahac kecbésémaŋ. 7 Yesu imi baec séwiguc kerec nalé imuaru humuc igucnec hia metecgémac ac séc kuhaguc kekera Anutu iwac muru siac yanda wamma kic masinéŋ ʒéwelec wammiyec. Waŋu Anutu eeya héima ewa qeriya howiacnec haima keru Anutunéŋ nimmiyec. 8 Waŋu Yesu imi Anutuac naŋa héla kerec, néŋ i acguc qenʒeŋ manʒeŋ nimma kua tohotoho haka imuac hénia eŋeyanec kuamuyec. 9 Imuhuc wamma eŋeya météré amuma niŋtohotoho ichéra momac yanda ionac aŋgéŋ titi hehe selia imuac ura waŋec. 10 Imuhuc waŋu Anutunéŋ Melkisedewac areŋiguc méndacma namma hofac oo ic kecmac niŋac qac buŋa qemiyec.

11 Melkisedewac ʒémaŋ ʒé ac sasala ʒémaŋac séc néŋ ini focdac niŋasarimuac séc qahac imuac niŋ ʒéasarimaŋ ʒé nimba osiosiya wanʒac. 12 Imi hélacnec, nalé horugiyu, bec kiwi ic wamma kecbunec ac séc, néŋ tosia ieneŋ hama Anutuac ackuaʒéc qambaŋa muŋguc liliŋgéma ku énécmimuac hezac. Ini namuac sac nema nene selia ménda nemuac séc wamma kecʒu. 13 Méŋnéŋ méŋ namu nema kecʒac imi kokoc, ic imuhuya imi wawaŋ meme solaŋawac ackuaʒéc imi ménda wamma memanec kecʒu. 14 Néŋ nene selia imi yandi tetecgia ionac buŋa, ieneŋ imi ewa qerigina hicŋitegiru manam batuciguc meefi waŋ énécmimia waŋu hia me biria imi niŋgésianʒu.